小心'S'型魚骨
我從來都唔寫食評，不過今次講比大家知道真有此事，等打大家小心進食：
在2010年2月頭，我想同太太及母親想試下河鮮同海鮮有乜分別，點知乘興而去，敗興而回。當晚去到店內，見到菜牌有河蝦，去魚缸睇下，答案係無。再揀蟹，答案又係無。魚缸得番些我唔知乜嘢名堂海鮮，於是交比部長發辦。佢話薑葱魚頭㷛好味；其後佢話個魚頭2斤重，每両8蚊(即是$8x32=256,另計加一即是$256+$26=$282HKD)。我話無問題。我再叫咗一個(窩)例牌翅裙燉冬菇($128)及芥蘭炒臘味($68)，呢兩樣餸菜不外如是，味道一般，乏善足陳。
講返個主角薑葱魚頭煲，上菜時個砂窩就夠大，但一打開蓋就全不吸引。首先講 (1)色 – 凈係見到炸過吓魚件物體，無金黃色又無焦穠跡。另外放咗好多生長葱，條條葱都超過三吋長；(2)香 – 全個砂窩無乾逼薑葱香口味，只有強烈生葱草青味，完全引唔起您食慾！(3)味 - 即管食吓魚件物體，食落係魚肉，唔知魚邊個部位。但好肯定唔係魚頭，更加肯定唔係魚雲。食物嘅味道同普通員工飯堂無乜分別。我身邊的兩老(老媽子及老婆)開始有微言。我初時都想算數。其後母親話想食[彈弓]；不個太太搵勻重2斤魚頭都搵唔到。跟住我發現到我食緊魚件物體，有一條[S]形魚骨(俗稱鬼王叉-因為此骨兩頭尖，如果被卡在喉嚨時，[S]形魚骨會不上不落，有機會導至窒息而死。又或者叫雷電骨-因其形狀似閃電圖案)。
此時兩老同氣連枝，即刻發功，大叫經理埋嚟，要求佢地解釋兩個疑點(1)點解搵勻2斤重魚頭都搵唔到應該存在[彈弓]?(2)點解唔應該存在响魚頭[S]形魚骨，會出現响薑葱魚頭㷛內(據聞[S]形魚骨只生長在近魚腩附近位置 – 如有錯漏，在此致歉)?
經理無解釋，但叫咗打大廚埋嚟。大廚埋嚟之後，見到條[S]形魚骨亦無解釋，跟住大廚重將整窩薑葱魚頭㷛拎走，佢叫經理換過第二樣餸比我地。兩老話已經無晒胃口，唔想再叫其他嘢食。我問經理個薑葱魚頭㷛有無得退回及取銷該項計價目收費，經理最終都話可以。
溫罄提示: 我想提醒大家食魚時小心'S'型魚骨。 |
登入
