登入
讀者食評
第 61 至 70 個
讀者食評
| Fat Angelo's 大方得睇 都幾鍾意哩Fat Angelo's，美式意大利餐廳，雖然價錢唔平，但計埋食物嘅份量、古雅嘅佈置、柔和嘅氣氛、仲有趁著經常推出嘅優惠哩幫襯，你會發覺又唔係咁貴咋喎！ 點解話佢大方得體，真係有樣你睇！點咗主菜、意粉或薄餅，佢都會免費送上麵包同沙律，一籃包有三款：麵包條、香草包同農夫包，食唔晒嘅佢又唔介意你打包拎走；相反，唔夠食，你問佢要好少少，佢亦唔介意喎！而沙律似係少咗水牛芝士嘅希臘沙律，地中海式，幾款新鮮蔬菜加D香草同橄欖油即成，清新美味，同樣，如果唔係太夠嘅話，出句聲D侍應都好樂意幫你添加，唔會話藉口多多唔想加俾你咁，當然唔好見免費就太過份不停咁要啦，失禮死人嘛！ 主菜點咗兩個：芝士焗吉烈矮瓜、迷迭香燒雞！揸住張優惠券，意式錦繡薄餅( 芝士焗吉烈矮瓜 好耐以前佢哋有一道芝士焗茄子，小弟印象甚深，因為腍香嘅茄子被芝士包圍住，咬落茄子軟硬度啱啱好，又富茄子味，焗軟身嘅芝士既濃且香，加上少少焗焦嘅芝士，仲正！不過，依家佢出咗隻變種版，唔知點解改咗矮瓜個字，咪即係茄子。將茄子鋪上麵包糠吉烈脆炸，再加埋芝士入爐稍焗，伴薯蓉上碟，香口之餘，無甚特別，因為茄子還茄子，芝士還芝士，只係兩者擺埋一齊，未有融為一體嘅感覺，都係以前個款好食D！ 迷迭香燒雞 賣相幾討好，半隻燒雞大概一開四、五左右，大大隻雞鎚放最面，再插住一條新鮮嘅迷迭香，而燒雞烤焗得金黃而帶少少微焦，算烤焗得幾夠火喉！味道故然主打係迷迭香朕香草味，大致上每個部位都嗒到迷迭香嘅香味，不過，外國人始終都係用雪雞，肉嚡始終對食味打咗折扣，再者，如果將隻雞再斬細件D，食起上哩除咗方便D之外，每個人都多咗機會試唔同部份。奇怪在每逢食西式燒雞，情況都係咁，可能係慣性，一斬細咗，就好似變成中式嘢咁！ 意式錦繡薄餅 薄餅分12吋同16吋，12吋即係平時晌PizzaHut見嘅大批，但16吋就真係超巨型，望落去大好多，見隔離枱有叫，可以有得比較！所送嘅薄餅係12吋，但味道就可以任揀，平貴都得，揀意式錦繡都係覺得大家都啱食。熱辣辣薄餅都等咗好耐至有，一焗好即係送上，面面嘅餡料都幾豐富：雞肉、辣肉腸、意大利肉腸、火腿、肉丸，無話免費就縮皮落少D料，大方有得睇另一例證；而批底厚度屬於厚批與薄批之間，咬落都鬆軟非常，相信發酵時間夠足。搵手揸住件薄餅，大大啖咁食，飲住杯凍飲，真係過癮！ |
garycwm | |
| 國際餐廳 垃圾 2010年3月朝早試過呢間o野 果個"光頭佬"都唔知咩人,冲d奶茶好難飲,我老友杯涷奶荼仲難飲, 我老婆話佢杯涷啡更更加難飲!!! 簡直垃圾!!! |
shityouoff | |
| 皇悅酒店 - 皇悅 33 餐廳 超巨燴羊膝 好耐以前第一次哩食晏，貪佢平，又可以食幾粒鐘，極之好hea；今次再重逢，原因係有得免費食番餐，不過，經常晌報紙見佢賣廣告，個自助晚餐本身都唔貴，仲要成人一送一，以價錢而言就真係超抵，但唔算係好超值，因為依度食物嘅種類同質素只屬普通，雖然佢每季都有做主題，除咗主題食物會緻細、高質D，其他就可能會係平庸少少，但實際D講為起一個人加埋一折後都係$160左右就食到一個自助晚餐，同依家出面嘅4、5星酒店收四五百蚊一餐，真係無得比架喎！所以我自己哩之前都唔會抱有太高期望，唔會用平時去4、5星酒店食嘅心態晌哩度食，否則，你可能會話佢呃人，點解生蠔又無、魚生又得一種、熱盤又少……等等投訴！不過，好老實咁講，若果要正價一個人連加一差唔多成三百蚊，咁就未必會哩，因為有其他好選擇！ 依晚閒日我哩到人唔到，真係成個場得幾枱客，少得有D可憐，所以地方顯得寬敞，木枱籐椅，幽靜，無爭食嘅場面，收碟斟水快手快腳，其實侍應唔多，只係客更少！ 沙律 只得兩款沙律菜，不過醬汁就有四款，加上7、8款配料如桃、車厘茄、粟米、紅腰豆、黑水欖……等，仲有4款預制好嘅沙律，另外又有新鮮菠蘿、同哈密瓜，任得你左溝右溝總配搭到你嘅心水沙律。難得兩款沙律菜都夠新鮮、夠爽脆，咬落「索索聲」，其他配料同預制沙律不過不失咁啦。 冷盤、海鮮 三款凍肉腸、青口、凍蝦、三文魚同八爪魚刺身，就係得咁多，後尾添咗款蚌肉，唔係好知佢個名，大致都OK嘅。係青口覺得削咗D，三文魚刺身未係好油甘，八爪魚刺身有D韌添。 意式小食 多款別緻嘅意大利小食：蕃茄水牛芝士、肉腸配意大利青瓜、意大利火腿配露筍、烤吞氧魚配蕃茄沙律…，一小碟一小碟咁，做得精巧，每碟份量細細一個人都可以試勻晒佢。味道又確有意大利色彩，賣相樣樣都做得有板有眼唔馬虎，好似蕃茄水牛芝士咁，蕃茄同水牛芝士打斜一層疊一層，再加少少香草醬上面，再灑幾粒松籽，認真好味！又好似個意大利火腿配露筍，兩片巴馬火腿橫放晌幾條露筍之上，再頭尾各加半粒橄欖，不單令味道豐富咗，個樣都好睇咗啦！ 熱盤 約莫有12、13款左右，因為係做意大利食品，所以有意大利野菌酥皮卷、意大利雲吞同意大利飯，仲有港式嘅炒青口、椒鹽蝦、蒜蓉蒸帶子……等等，較為吸引人注目係個燴羊膝，好大隻，一件有成兩個拳頭咁大，所以我哋夾咗一件，4個人一齊幹掉佢，兼且幾好食。整體哩講，都算係過得去，幾樣意式食物都有D水準，唔係得個樣，好似個意大利飯，濃香芝士味，飯粒煙韌有咬口！ 甜品 陣容唔算好鼎盛，但印象中大概都有11、12 款左右，大致上都做得似模似樣，多數都係一般自助餐常見嘅種類，例如藍梅芝士餅、法式燉蛋、意大利芝士餅、布甸、奶凍……，唔見有咩好特別或好有創意嘅甜品，但質素都唔太差，啱到大眾要求，所以依部分都合格啦！其中嘅蘋果金寶撻同朱古力三重奏蛋糕小弟就比較欣賞，因為前者細細粒好易食，蘋果酸酸甜甜咁，加埋面層麵粉牛油做嘅金寶粒，幾香脆；而後者不外乎因為有三種朱古力味嘅魔力！ 做到咁平都唔見佢多客，食評又成日被人話佢少嘢食，又無貴嘢，咁有D人睇完D食評咁差梗唔會去啦，簡直惡性循環。我覺得佢哋真係要轉型，既然地方有限，食物又唔多，收個百幾蚊一位，不如轉做半自助仲好啦，頭盤、沙律、甜品任食，不過做得精D，提高番食物嘅質素，然後等客揀個主菜，主菜可以每季唔同主題又得，又或長期有7、8款唔同地方嘅菜式都得，反正有D人食自助餐都唔係食得好多嘢，半自助可能仲啱依D人！同樣都係收百幾蚊位，D人就唔會用食自助餐有幾十百樣嘢食嘅心態投訴依樣、投訴個樣喇。 |
garycwm | |
| 元氣壽司 好！ |
|
|
| 元氣壽司 好！ |
|
|
| 元氣壽司 好！ |
|
|
| 鼎泰豐 獨沽一味 依餐慶祝姨仔舅仔生日飯，梗係要請佢哋食好D啦，名店或人龍店晌質素方面就比較穩陣，所以就揀哩鼎泰豐喇，知佢無得訂位，就由小弟負責攞位，星期日6:00pm到，幫襯晚市嘅人陸續入座，我都唔係排好耐就有枱喇！其後更係見好多人晌門口等，所以一係唔哩，一係就早D，食佢晚市嘅第一輪客，否則就有排等！ 我哋一枱人6大2細，見佢樣樣都份量細細，所以都叫咗好多嘢：紹興醉雞、糟汁靚鴨舌、小籠包（6隻）x2、蟹粉小籠包（6隻）x2，糯肉燒賣、油豆腐粉絲湯、清炒芥蘭、蒜蓉菠菜、排骨湯麵、紅燒牛肉湯麵、蝦肉餛飩麵、蝦仁蛋炒飯、傳統千層油糕、赤豆鬆糕、八寶飯（細），連埋茶錢加一，一共990個大洋，你見都係D前菜、小食、點心類同粉麵飯，都食咗成近千銀，所以老實講句唔算平，係叫做唔使坐飛機過去食，問我值唔值？都OK嘅，因為小籠包確係高水準，醉雞、鴨舌、牛肉湯麵都好食，其他就只覺係平平無奇喇！服務方面，除咗久唔久問你「仲有無嘢加」之外，都無其他擾民動作，上菜動作超快，不過，始終個場好旺，侍應都招呼唔徹，變得收碟、斟水等閒事有時會慢幾拍，佢哋總算時刻保持住笑臉迎人，況且又無催埋單D衰嘢，整體服務評分可以俾中上架啦。另外唔明點解佢哋唔俾訂枱，唔使吓吓要人走去排餐懞，唔通佢對自家無信心，怕好多人訂咗枱會甩底做少好多生意，定抑或吸引唔到即場客補番甩底嘅訂枱客？相信都係營銷策略，要食就要哩排，吊高哩賣，等多D人晌門口企住等位，營造超旺場氣氛！香港人一向怕蝕底，捉晒心理，等得耐都去排，所以，小弟食過之後，獨沽一味小籠包外，都無必要再哩，除非可以訂枱。 因為唔係樣樣都話咁好食，平平無奇個D就唔多講，費時又嘥版位，揀幾道菜同大家分享吓： 小籠包、蟹粉小籠包：皮薄、湯汁盪漾，真係夾起上哩都怕佢穿呀，小心夾，又要小心熱，因為湯汁好辣口，而肉餡味鮮打得夠鬆唔死實，仲無乜肥豬肉唔覺油膩，醮D醋感覺仲鮮！但緊記趁熱食，否則攤耐咗一來皮會變得有少少硬，二來湯汁同肉餡都無咁鮮香；尤其蟹粉，凍咗會有D腥添！所以，哩到就「咋咋淋」食咗去，唔好你讓我讓食剩件擺到尾，盞嘥晒！ 紹興醉雞：睇番各方食評，有讚有彈，睇哩有可能依道菜嘅水準好飄忽，咁小弟今晚好彩D，酒味無問題，幾香，唔過重，雞肉唔算得超滑，但無嚡口，而且雞皮又爽爽哋，皮下脂肪唔多，好食！ 糟汁靚鴨舌：每舊鴨舌有番咁上下大，糟汁（浸過糯米酒的酒渣）引發出嘅酒味，食起哩竟然帶點甜味，鴨舌皮肉爽口，係個治口痕嘅前菜小食。 紅燒牛肉湯麵：湯底睇樣就超濃，嗒落都肉味甚重，絕對真材實料；紅燒牛肉夠晒牛肉味，炆得夠腍夠鬆化，少少辣；麵質就無咩特別。不過我哩碗得4件牛腩，仲要賣到$58碗，好食但唔值，行勻香港地大把好食過佢但又平過佢嘅本地薑麵鋪啦，所以賣到咁嘅價錢，真係唔需要係度食！ 排骨湯麵：另一個唔需要係係度食嘅貴價麵，排骨即係炸豬扒，確實幾大塊，但味道普通，無乜個性，而且有D實，唔夠鬆，佢比牛肉湯麵平少少，但都要賣成$48一碗。 傳統千層油糕（$36）、赤豆鬆糕（$36）、八寶飯（$38）：飯後甜品試咗哩幾款，失望之餘兼呻笨，千層油糕一客得個兩件賣成$36，橫睇掂睇除咗好多層之外，無乜味道，無鬆糕咁軟熟，又唔似酒樓點心個隻千層糕咁有蛋香；而另一款赤豆鬆糕，都係一客兩件賣成$36，係細細個隻喎，糕身唔覺佢璧，無乜米香，赤豆又唔覺咩味，唉，嘥錢叫添；至於個細八寶飯，好彩叫個細啫，賣相幾靘五顏六色，之不過真係過甜，話八寶好似用8種香谷和果實哩做，但睇番依個八寶飯，就覺得有少少行貨，有紅棗、有蓮子、又有少少乾果放晌面就係咁，齊唔齊八寶真係大疑問，總之賣到$38就唔抵食囉！ |
garycwm | |
| 唐順興 平而抵~ 今日經過元朗見到唐順興推廣$9一個飯盒~單雙併都係$9 開頭都有d疑惑,但月尾無計~買盒試試 買左盒"叉雞飯"~$9 都ok,無咩問題,起碼唔似其他個d真係咁污糟 同埋門面衛生都幾好,可以值得一試~～ |
eeeeeeeee | |
| 尚膳坊 隱世, 出色小館 lunch時間, 去到西灣河做野, 飲茶飲到悶, 成班同事就撞左入去試試呢間野... |
win1980win | |
| Subway 我成日都食SUBWAY.....一想食包包就會諗起subway, 大大件好抵食啊嗎
同埋subway可以自己揀醬, 可以要好多款醬, 個感覺都幾特別, 哈哈哈
同埋$29個lunch 真係幾抵, 所以成日都會去幫襯.....哈~~ |
adelinemama | |
