晌展貿完咗聚會，要搵地方食晏，唔想去德福因為太多人，本來諗住去MegaBox，但咁啱行到去國際交易中心醒起上面有幾間新嘢，不如一試，話新嘢其實都開業咗大半年，只係依區甚少留下足跡！卒之揀咗沙嗲沙嗲，原因有二，一就係貪佢一室潔白簡約裝修，樓底又超高，兼玻璃屋設計，感覺清爽，如果唔係因為近排天氣熱坐出面露天位可能仲爽；二就係知佢賣東南亞菜，好想食吓南洋嘢，好似有段時間未食過咁。

先哩一個精選拼盤（$68），有蟹餅、香葉包雞、豬肉沙嗲、鮮蝦青木瓜沙律，配襯一小兜沙嗲醬同一小兜酸醬，食濃D就點前者，想開胃D就點後者。雖然個拼盤有四款嘢，但份量唔多，每款兩件，沙律就一小碗，擺得幾精緻。蟹餅都幾鬆化，但就唔好諗住啖啖蟹肉，始終都只係收你幾十蚊個拼盤，不過至少都唔係得堆粉；香葉包雞，點都只係碳燒雞翼，食唔到有咩香葉嘅味，不過燒得唔乾身，幾香脆惹味；豬肉沙嗲串，無乜太特別，都係靠點沙嗲醬哩提味；鮮蝦青木瓜沙律，大蝦幾爽口，青木瓜沙律酸酸咪咪，食落令人感到幾透心涼。

泰式冬蔭雞湯（$25），有個冬蔭嘅名，湯色又泛晒橙紅咁，都知有番咁上下辣，不過，又比預期中無話辣得好犀利喎，辛辣程度適中，小弟唔太食辣都接受到，我估多少都為港人口味調校過。依個湯比冬蔭功多一份雞肉嘅鮮甜，好冬蔭功者不妨一試，醒胃美味！

肉骨茶配飯（$42），有人好怕肉骨茶朕味，因為加咗當歸，但沙嗲沙嗲嘅肉骨茶整體藥材味唔太重，卻仍然保留到肉骨茶個種獨有嘅藥材同香味，甘甜濃郁很順喉，而大大件嘅排骨燜煮得非常鬆化且入味，唔會肉骨還肉骨，茶還茶咁分離。

怡保貴刁（$48），平時食貴刁都係炒嘅，依個怡保貴刁係湯嘅，賣相幾搶眼，襯晒夏日陽光，材料有蝦肉、雞肉，湯底鮮甜無味精，所以食完D貴刁都唔好放過個湯，記住一飲而盡唔好嘥！

對於沙嗲沙嗲，整體哩講，食物有特色，價錢又唔貴，質素有水準，地方又舒服，所以下次再過哩依頭都有興趣再幫襯！夏日總係令人懶洋洋，寬敞環境，又無匆匆趕趕嘅景象，食住南洋菜，個人變得更懶洋洋。

年初同素食親戚食過一次晏，環境、食物都合晒心水，有國內親戚哩港自由行玩幾日，先食番餐清淡D嘅就想起常悅，對佢有一定嘅信心嘛，跟住再試其他香港美食！同上次一樣，都係坐晌館子外嘅開放雅座，感覺燈光通明D。

甫坐低，第一時間叫咗碟錦繡齋鹵味，細細碟，當前菜小食過吓口癮，邊食邊商量叫咩餸。錦繡齋鹵味不外乎都係齋燒鵝、素豆腐、齋叉燒、酸齋等等，質素唔講得好高，但平穩踏實，做出應有口味，好似素豆腐，豆香濃郁而又有咬口，酸齋酸甜有至，不會過酸！

常悅有個滋潤老火湯餐牌，每晚供應一款，一窩都係賣$45，夠七、八個人飲，我哋香港人都係鍾意飯前飲碗靚湯先，依晚係老黃瓜煲五色豆，佢仲晌餐牌寫明功效：清熱利水，消炎解毒，啱晒啦，老黃瓜清熱消暑，五色豆（紅豆、綠豆、黃豆、黑豆、眉豆）強身保健，點止係老火湯，直情保健埋呀！無味精就唔在講啦，夠火喉，飲落味道順喉，材料十足。

除咗老火湯餐牌，仲有個廚師推介餐牌，有15款之多，都係賣$50-$70左右，點咗其中兩個：越南米紙卷及士多啤梨骨。前者（越南米紙卷），係素菜中少有做得賣相咁精緻，晶瑩嘅白蘿蔔絲襯底，米紙包住生菜、紅蘿蔔絲、素火腿絲，斜切一開二，一長一短、一前一後垂直咁放晌白蘿蔔絲上，有晒層次立體感，味道清脆，點少少白醋，醒胃怡人，夏天好啱食；後者（士多啤梨骨）色澤豔麗，黃、紅燈籠椒不單鮮甜，又好襯色，「肉排」咬落真係幾似肉排，隱隱約有朕士多啤梨香味，又係另一個夏日開胃菜式，果然廚師推介！

跟住，就晌主餐牌叫多4個餸，我哋7個人相信夠晒食喇。兩個素菜有：雲腿扒雙蔬同竹笙鼎湖上素，而兩個飽肚嘢就有雪菜三絲炒年糕同崧子仁香椿菜炒飯。
雲腿扒雙蔬，正！一片片嘅雲腿似足鮑片，你話佢係鮑片扒雙蔬都得呀，素雲腿腍滑，小棠菜嫩綠爽甜，鮮草菇又大大粒，難得師傅肯花少少時間整靚個樣，下層嘅小棠菜同草菇隔住隔住咁擺，上層嘅雲腿就工整咁排好，再打個玻璃獻，色香味俱全！
竹笙鼎湖上素，一個素菜大雜會，有冬菇、蘑菇、鮮草菇、木耳、冬筍、珍珠筍等等，主角竹笙當然唔少得，仲要鋪天蓋地咁多，堆滿碟面咁滯，確實抵食。竹笙爽脆，其他材料亦煮得恰如其份，無過熟過生，而整體靠個素上湯燴出味道，依方面無考究，但食落夠味無失場！
雪菜三絲炒年糕，素肉絲、冬筍絲都切得非常幼細，加埋青、紅椒絲，仲有雪菜，兜炒上海年糕，雖然簡單，但夠惹味，炒年糕又夠煙煙韌韌，平凡中來得啱口味。
崧子仁香椿菜炒飯，大多數素菜館都有依個炒飯，六榕食過覺得好好食，今次晌常悅再試，覺得仲好食添。首先，飯粒炒得分明已保證唔差得去邊，加上師傅炒到飯粒金黃，而崧子仁既香且脆，香椿菜係D醃菜類，帶鹹味，切到細碎用哩炒飯就連鹽都唔使落，已經可以幫個炒飯提味，的確味美！

最後係甜品時間，一口氣叫咗三樣：生磨合桃露、綠豆糕、豆沙窩餅。叫生磨合桃露係因為上次食過好正，既香且滑，但係今次有少少走樣，雖然同樣爆發出濃郁合桃香味，幼滑得一啖就滑過喉嚨，濃稠、甜度都啱啱好，可是嗒真D總覺有少許「益味」，初時以為係自己錯覺，但同枱有人咐和，不過朕味其實就好輕微，相信係磨合桃時有一粒半粒壞合桃所致，由於大家都覺得事小，食完就算；綠豆糕則係個經理介紹，話係今日推介好抵食，所以又即管試吓，一碟有八件，都係賣$16，確實幾抵，質素就唔錯，清香綠豆味，糕身又軟熟，唯賣相就欠奉，似係晌一大底綠豆糕中抽八件隨意堆埋上隻碟度，既然切成三角柱體，稍為擺好D賣相已好唔同啦；豆沙窩餅就係自已想食而叫嘅，一客六件，件件都幾多豆沙餡，仲好軟滑，紅豆味又夠，外皮炸得啱啱好！

點解個標題叫「常悅會更好」？就係想講話做任何嘢，保持住開心嘅心態哩做，效果自然更好。今晚常悅嘅服務員就唔係好「常悅」喇，好似個生磨合桃露上到枱，個經理睇樣唧都唔笑咁款，一味急，所以搞到碗邊，枱面周圍都係合桃露，被人覺得佢好似趕收工咁。另外，未哩甜品前，服務員先收拾一下枱面，係個表現服務嘅好機會，點知佢就做D又唔做D，應該收拾埋之前食過晒嘅碗筷，再擺番一套新嘅瓷碟加隻小叉，方便客人享用甜品，可能佢哋覺得合桃露已經有新碗裝，綠豆糕又有牙簽篤住晒，豆沙窩餅凈得俾個公叉就當搞掂，依D細心位真係唔合格囉！雖然大體各人都滿意成餐飯，但如果服務員時刻保守笑臉迎人，食客會食得更稱心！
 

好

一直都有買這間餅店的麵包同芝士餅食,味道好,酒店級水準,價錢合理。

滄浪亭實在有D難搵，一來鋪頭細細唔顯眼；二來美孚新村期數多（共八期），衰在唔係完全順次序；三來樓宇跟街號排都係正常丫，點知同一堆樓拍住一條吉利徑，一條百老匯街，隨時你會發覺右邊幢樓係19號（吉利徑），左邊幢樓竟然係61號（百老匯街），真係好易搵到傻！路在口邊，總之美孚A出口，搵路上平台，問人快過自已搵。

豆腐潤舖位，放咗成4張枱，全店得15個位，其中兩張枱又幾乎係背貼背，大隻D都坐得唔舒服，環境細得緊要，所以，哩食嘢就要有晒心理準備食完要即走。另外，每逢就開檔都會有D人企晌門口等，佢哋員工晌裡面食緊飯，係唔開門就唔開門，亦唔理出面嘅人，萬一個日人多就有可能出現爭位嘅情況喇，總之佢哋就唔會特別理D秩序嘅問題。仲有，如果晏咗哩就不如唔好哩，隨時會話依樣無個樣又無，點為止晏？午市嘅兩點後同晚市嘅八點後囉（完咗個午市佢哋唔做生意，想食就要等6:30pm開始嘅晚市）！地方細，材料唔可以預得多，係賣晒就賣晒。再者，服務方面唔好有咩期望，雖然全女班，但唔係陰聲細氣個款，可能會粗聲粗氣咗D，大聲唔等於無禮貌，但俾人感覺就係掘咗D。因為幫襯多數係街坊熟客，以上事情好少發生晌佢哋身上，我哋依類新街坊又唔熟，就要習慣吓喇！

滄浪亭賣上海麵，仲有其他小食同菜飯，款式都算多選擇。兩公婆不約而同揀食麵，一個叫嫩雞煨麵，另一個就揀燻魚麵。

嫩雞煨麵 $33

湯底係嫩雞煨麵嘅靈魂，奶白色嘅湯底滲出肉嘅鹹香，大概離不開用老雞、金華火腿、瘦肉、豬骨其中三幾樣哩熬煮，湯色甚白相信係花唔少材料同時間。煨麵應係上海菜獨有嘅煮麵方法，平時食湯麵就大滾水中煮熟D麵再加上湯哩食，煨麵就將麵放晌D肉湯同煮同食，麵條吸收咗湯汁食起哩就更加有味。因為依個湯底做得好，再配以已經去皮嘅鮮雞丁，同埋已細切好嘅青菜，所以，帶出雞肉嘅鮮嫩同麵條嘅滑溜。雖然食哩個麵主要係食佢個湯，但D雞粒嘅份量又未免少得可憐！

燻魚麵 $32

試咗個煨麵，又試吓佢個湯麵，燻魚兩大件，比起個嫩雞煨麵自然更有睇頭，與其話燻不如講話係炸，我估佢鋪仔細細都好難有空間慢慢燻D魚，不過就炸得色香俱全，係個味欠咗少少咁，醃得未夠入味，又有D邊邊脆口位，不過因為放在晌湯，其他浸咗晌湯裡面嘅脆位就腍咗，有機會再食就叫佢燻魚另碟上，可能效果仲正。至於上海麵麵條咬落幾有韌勁，又拉得幼細，而清湯都OK，當然無嫩雞煨麵個湯咁正啦，但兩者食法唔同又唔可以咁比較嘅，總之，依個麵都係有水準之作啦！

如果一間食肆嘅食物好味、又有水準、價錢又經濟，而室內環境、裝修都可以係其次，不過，假如室內環境係普普通通之餘，再加上又殘殘舊舊，就可能打了折扣。今日哩幫襯喬妃齋，就有咁嘅感覺，雖然店員有好嘅招呼，環境、枱凳、碗筷都乾凈企理，但牆身不單有點殘殘舊舊，仲有污漬斑斑嘅情況，觀感上真係令人有D不自在！既然坐低咗，就只好隨遇而安啦，反正都只係食個晏！

隨遇而安，就點了一個沙律、一個腸粉和一窩湯麵，雖然點得唔多嘢，但三個人都好夠食。

柚子沙律$40 – 唔好見佢叫柚子沙律，其實好多款材料撈埋一齊，生果沙律做底，再鋪上好多柚子肉，再放幾片芒果片做裝飾，仲有用奇異果同香蕉切片圍邊，全部擺埋一齊鋪滿成隻碟，堆到成個小山丘咁，份量方面一D都無欺場；生果沙律普通啦，柚子肉就真係幾清甜多汁，奇異果同香蕉都熟透夠香夠甜。好食！其實當佢係飯後果一樣得呀！

素金銀潤腸粉$25 – 依客腸粉，仲貴過晌酒樓食，腸粉皮叫做得OK，但質感就有少少削，而素金銀潤有D食而不知其味，都只係覺得食緊素肉一舊。

時菜鮮菇腐球湯麵$68 – 好簡單嘅材料，時菜幾條，鮮菇十粒八粒，腐球？似係切片素肉十數塊，賣$68確實有點貴！唯靠湯底提味，不至於淡而無味，麵條反而引起我注意，比平時晌麵檔食嘅麵感覺仲好似幼細D。老實講句，個麵俾人嘅感覺真係平凡普通，雖然是素湯麵，但稍為缺乏個性！

收$5一個茶錢，仲有加一，而食物未見好有水準或突出，再者環境殘殘舊舊，以消費計（我哋只係叫咗三樣嘢）覺得有點貴，如非心想一試杏璇姨嘅鋪子，以心靈享受一餐齋菜，附近較出色嘅選擇多的是。

近排成日講後生仔鍾意hea，其實間中hea下又無妨。今日就哩咗King Ludwig依度hea，查實原本係約咗班朋友食lunch buffet，但當中有人話要差唔多兩點先到，通常lunch buffet去到2:30pm，人哋好多時又要預備下一場tea buffet，咁佢唔使食啦。想改不如食tea buffet啦，又輪到有人唔想咁晏，結果就醒起King Ludwing嘅「tea buffet」係開2:00-4:30pm，比食晏遲少少，比食tea又早DD，所以就當依餐係lunch + tea啦，過咗4:30pm佢哋又無趕，真係hea足成個晏晝！

未試過晌依度食夜晚飯,，反而之前哩過幾次食tea，都幾鍾意依度，因為裝修甚有德國啤酒屋嘅氣氛，好有特色，難得佢包杯餐飲係可以叫啤酒嘅，係我唔好酒可惜D啫。因為地方所限，可以用哩擺食物嘅地方唔太多，留心嘅話你係見佢將入門口跟住直入去主大堂嘅梳化位變成擺放食物區，將數張長枱合埋一字排開鋪上枱布就用哩擺上大部分食物，包括三文治、小食、沙律、熱盤、烘多士、即制班戟、生果、甜品，佢每類食物每次出得唔多，但就經常補充，所以都好足夠，而出奇係甜品比起其他食物相對款式多。對面有張細枱放咗西湯，好鍾意個湯壺，有D麵包圖案，寫住Hot Soup。另一邊係佢嘅開放式大廚房，主打有即做意粉，同埋招牌脆皮鹹豬手同一D油炸烤焗嘅熱食，好似德國肉腸、炸薯條、烤粟米……等等。再側邊就擺咗個雪櫃仔放咗幾款雪糕，都盡量做到應有（類別）盡有！

如果你好似小弟咁係大食之人，不妨挑戰下自己，應該可以試晒佢咁多款食物嘅！你可能會問：凈係鹹豬手咁大隻都已食到半飽啦，仲點可能試晒佢所有嘢呀？因為係tea buffet緣故，好多平時見開嘅德國食物都係大大份，但依家佢就會拆細咗，咁就唔怕試唔得多D嘢啦。

相反，唔係好擦得嘅，就要重點出擊！小弟心水有以下：
沙律：選擇認真唔多，但勝在夠新鮮，況且大擦之前食D沙律，醒醒個胃之餘有助消化。
蛋沙律包：貌似普通，蛋沙律做得細碎又香，面面撒少少紅椒粉，效果唔同晒，加上個包鬆軟有質感，有麵包香！
烘多士：專人即做，晌麵包上加好材料，再放好芝士後就晌烘爐下將芝士烘到微焦，熔咗嗁芝士好香好柔軟，新鮮快手食就最正，但小心燙親口！
即煮意粉：每枱有幾張Pasta Order Card，去到檔口揀好材料同意粉類別，師傅煮完有侍應拎比你，唔使企晌度呆等，好貼心！即煮嘢幾時都好食D，主材料要煙肉加蝦都幾襯，不妨試吓蜆殼粉，唔錯！
德國豬肉腸：肉味濃係特色之一，腸肉唔肥，又有朕朕香草，確係出色！
脆皮鹹豬手：唔多講，一間德國啤酒屋，鹹豬手都會係佢嘅名物，其他食評寫咁多，我就唔嘥時間講，凈係一句：記住要試！
牛奶布甸、泡芙：甜品雖多，但印象唔深，未見話有咩多突出，係有個牛奶布甸同泡芙值得添食，因為前者好有奶香，又滑身唔硬實；後者就大大個泡芙，香脆兼備，裡面嘅吉士又打得幼滑！其他嘅就只即管一試。

招牌農夫包晌個buffet上就未見蹤影喇，但收$128+10%我就甚覺抵食。
 

跑馬地不嬲都唔係搵食之選，因為地鐵唔到，位置又隔涉，今趟哩駿景，純粹因為信用卡優惠，有6折喎，精選晚餐$188-$258，其次個餐單選擇又幾吸引嘅，否則，再平都未必嘥時間走咁遠哩試啦！

因為第一次哩，睇定地圖確定吓位置，都近電車總站，搭新巴都方便，所以唔難搵。一晌以哩，對酒店嘅coffee shop嘅印象都偏向高檔次、有格調、有氣氛個種，但搭電梯上到哩，完全兩回事，地方細細，座位唔多，全場得36個位，枱凳、燈光、整體環境都比MacCafe更普通，唯一可取係地方闊落，枱凳排得唔逼。一個侍應睇晒成個場，可見依度對佢自己生意額有幾多「信心」，實際上今晚又真係無乜客，哩到之時有一枱客，但得一個人，我哋係第二枱客，其後晏D有第三枱客，一家人成5個人，直到我哋差唔多九點走，都未再有人哩！更搞嘢係，晌近水吧位裝咗部大電視，播緊無線，未有落單或上菜時，連個侍應哥仔都睇埋一份，真係估唔到此情此景發生晌酒店嘅咖啡室，有點點屋村茶餐廳個種家庭味道，當然我都唔介意個環境，不竟我哩係食好嘢，唔係食環境，咁樣反而令我少咗份拘謹，唔使講咩餐桌禮儀之類添，爽呀。

香芒蟹肉沙律

沙律打頭陣，清清味蕾兼醒醒胃，芒果肉香甜，蟹肉鹹鮮，沙律菜清爽，油醋汁酸溜溜，整個沙律就係咁簡單，無花巧，但食出材料質素及鹹甜酸爽嘅配合。

野松茸菌忌廉湯

跟住細細個嘅香草麥包，配一個濃湯，睇色澤知佢唔係行貨，野松茸菌味道甚濃郁，每啖都真係感覺到佢嘅精華，湯底又做得夠滑身，唔會水汪汪，又無話杰撻撻。而且，食完個沙律都要等好一陣先上個湯，所以，覺得佢唔係話一早煲定一大煲當例湯咁，可能有D工序做定，有單到就再加工咁！

炭燒三文魚柳伴老虎蝦配天使麵

太太鍾意食魚，所以主菜佢揀依個天使麵，係唔係真係炭燒就唔係好肯，因為食唔到個種炭嘅香燒味，不過件三文魚就做得好外皮香脆，內層又出奇咁嫩滑，而且大大件份量十足，好有睇頭；老虎蝦雖然得一隻，但一樣大大隻，去晒殼，可以豪氣咁一大啖食落去，蝦肉爽口，不過唔算好彈牙；天使麵煮得啱啱好，果真柔軟如天使髮絲，最怕煮到「爛pat pat」，所以，幾樣食材都做得咁好，令到整碟天使麵都表現出高水準。

燒紐西蘭羊扒配洋蔥炒薯角

平時少食羊，所以主菜有得揀就要揀食佢喇。燒紐西蘭羊扒一客有三件，每件都唔細，所以過足癮，當然都要件羊扒好食架，咁確實D紐西蘭羊扒真係幾正，豐富嘅羊味唔太羶，軟熟食落無渣；配上炒洋蔥同薯仔角，再沾D燒汁同食，一流呀！掛住食，無影相添，仲有，睇住電視哩鋸扒，除咗晌屋企，出街未試過，嘻嘻。

香蕉班戟伴芝麻雪糕

嘆完主菜，我哋都抖咗一抖。輪到甜品登場，班戟餡料無得揀，指定係香蕉班戟，但勝在班戟皮煎得好夠薄，香蕉肉又熟得夠透，無生青味，而忌廉落唔太多，咁女士都唔怕肥啦；至於雪糕同樣都係得芝麻味無得揀，芝麻味香而奶味唔重，應該唔係貴價品牌嘢。賣相做得麻麻哋，隨意咗D，要挑剔係個雲喱拿汁，落得少之餘，唔見有雲喱拿籽，明顯係用香精做，不過都算係小事一椿！

即磨咖啡

食完個味美西餐，嘆杯即磨咖啡，又係估唔到飲落幾醇香、幾滑身！食咗一餐好嘢，真係令人幾身心舒暢。

個個星期都會轉菜單，所以今日唔知聽日事，有心去最好問問有咩食，通常主菜會有海鮮、牛和羊三揀一，視乎食咩主菜收咩價錢，可惜，做咗一轉信用卡優惠依家就無再做，單睇價錢感覺就唔係咁抵試喇！希望第時見到佢出多D優惠啦！