呢間沙嗲王都係第一次去, 見佢開左張咁耐都未去過咪試下囉, 首先就係例排動作”等位”, 超多人, 等左成半個幾鐘先有位, 一去到就叫野食, 但係d野食好耐先黎, 可能因為多人啦, 果度最好食就係佢個白咖喱豬扒飯, d咖喱汁係非一般既好味, 不過個燒汁雞扒飯就比較乾喇, 好似無汁咁, 要叫個waitess拎碗燒汁俾我地, 當我地問個waitess點解碗飯無汁既時候, 佢仲夠膽死話”個飯係無汁架喎”咁咩叫”燒汁”雞扒飯呀..後來我地堅持要佢拎碗汁俾我地佢先肯拎….

我自荃灣呢間總店開業以黎, 已經一直支持至今時今日, 初時只是一間細細的舖位, 只有4-5張圓枱, 漸漸搬大舖再開一間又一間分店, 佢d米線真係超級令人回味無窮, 最吸引就係佢既湯底, 好夠味, 我曾經食過大辣, 中辣, 小辣, 真係各有各好, 客人仲可以根據自己既喜好揀選配菜既份量, 佢落單既型式有少少似車仔麵, 每個餸 $3咁叫, 食幾多叫幾多, $30唔駛就有大大碗, 吃到要抱住個肚走…超抵…..超好味….!!

岩岩過左個情人節, 同女朋友去果度食飯, 果度既水準o係成個牛頭角黎講真係好高架, 佢有好多排餐, 焗飯, 好多野食, 佢d排餐好大碟, 超抵食, 不過食飯時間去到就一定要等位喇..!!

每次去都係食佢既燒味飯, 叉雞飯, 四寶飯, 樣樣都掂, 佢d叉燒又軟又好味, 價錢合理, 燒味飯有一碗同一碟, 價錢都係差幾蚊, 叫一碟都只係$30, 用料十足, 值得一試。

香港仔魚蛋粉最出名就係魚蛋啦, 我次次都會食佢個魚角米線或者河粉, 最好加埋紫菜架, 佢d湯底全部都係魚湯, 味道又夠濃, 不過最衰係d位好迫, 因為多人, 所以食完就要急急腳咁走…

佢有個叫做”紫菜海鮮炒烏冬”真係超級好食, 我每次去都會食, 我未試過d平時會放湯食既紫菜用黎炒烏冬, 個組合好有新鮮感, d紫菜炒完出黎仲好爽口, 食既時候加埋少少辣椒油就梗加好味喇..!!

上次星期六晚去食飯, 仲記得佢有好大個plasma電視機, 我地叫左3個小菜, 其中一個係叉雞雙拼, 佢d雞肥到既…一舊舊透明既肥膏o係雞皮上面, 好核突, 見到都唔想食, d叉燒又肥到死, 食完都驚血管閉塞呀, 佢個炒菜又係勁多油, d油好似唔駛錢咁, 有高血壓既千其唔好去….

佢d咖喱都真係幾好食, 叫埋個蒜容包點咖喱汁真係一流, 另外佢個辣肉炒飯真係超好味, 鍾意食辣既朋友真係要試下..!!

我都係第一次去呢間野食飯, 我記得我地上次星期日lunch time去, 岩岩去到果時好多人, 要等位, 等左一陣入到去就叫野食啦,,,點知等左超耐d野都未黎,,就連手卷都勁耐, 都唔知d人做咩架, 好采佢d野食都幾好食補返數, 佢lunch time有好多lunch set, 有定食, 便當仲有拉麵餐, 價錢都算平, 平均都係$40左右, 佢d魚生切得好厚身, 好有口感, 佢有個牛肉飯整得好好味, 仲有個墨魚手卷好新鮮…